مالات حرب.. ازهري عثمان عبدالحفيظ.. ما بين امي بدور وابوي هاشم أرواح في مقابر حمد النيل

شهر تمام ولاد الملك صديق حالكم غير ، الغصة تطعن في الحلق، الحزن ذرف الدموع ، هاشم، حسن، نائلة، بدور، انصاف، وابو القاسم ، غطيتوا على المساحات ، علي الامكنة ، صحافة، اعلام، ووسائط داخل وخارج السودان..
امي بدور :
شايفك جاية الليلة فجر ، مالك يا عز الملوك، الطلة ما هي الطلة، الحزن كاسي الوجيه الجميل ، واقع الحال عليك غلب يمة ولا شنو الحصل ، قالت لي روح ابوك واخوي هاشم في مقابر حمد النيل، رغم انو ، لا زيارات، لا أرواح جديدة، ما الدعوات شحيحة، لا قنوت، لا تهليل لا تكبير ، بس سبب الطلة الليلة، أرواح تحلق من بعيد فرحانة ، وروح هاشم بيناتن سعيدة، تقفز طربانة ، ما هي على الجمال مفطورة موهوبة، وبي جاي ارواح تعيسة محتارة ، وكانها في دعاء عشمانة، وحالة اغني عن السؤال .
ونحنا يا الزعيم خلينا ساي، ياهو حالنا الفات، قريب عامين، لا نوبة لا طار، لا بخور تيمان، لا لالوبة ألفية، لاشيوخ لا حيران، لا دراويش ملو الساحة، ودوروا شيمة بحر ، لاحضرة عصرية، لازفة صوفية والدعوات لسة شحيحة.،وكانو الحرب نزهة ولا سياحة ولا رحلة ترفيهية.
قول لي يا ولدي زيدني في الحصل بيتين:
امي بدور :
الحال ما بتوصف ، ياها الحرب اللعينة ، قضت على الأخضر واليابس ،مشاهد مرة امي بدور ، جوع وقهر، موت إصابات، لا كهرباء لا موية ، ودة الخلي ابوي هاشم على الكارو ارحل واسافر بعيد وهناك انتقل وفي غير البقعة المباركة يقبر، وكان مناهو طرف شاهد في مقابر السودان.
امي بدور :
كم عيد من أعياد الله ما عيدنا، لا في الوطنية فرحنا، لا راس السنة جمعنا، ولا بالمولد احتفلنا ولا بي زفتوا استمتعنا.
مهارات ثقافات جديدة، سادت تحت مسمي تجار حرب َ، بس الماضي حاضر ، بي  صورو الجميلة، قيم واخلاق والحاضر ضباب وصورو دموية..
الناس تموت، في مدرسة تقبر، في شارع، في اوضة، في حوش ، وميدان بانت اشهد، جوار بسط الامن.. اعلامنا مشاهيرنا ثوارنا  قبرو، علي راسن الشيخ الحبر ،آدم دوكه، صلاح التوم، عبد العزيز حاج أحمد، حسن صلاح محمد عبد القادر، وضاح سامي حسين ، عثمان يوسف (سمارة)، محمد أيوب (قرض)، الطيب عصفور،الممثل الدرامي عمر الشيخ الكامل، التومة عبدالوهاب، اسماعيل حسن بلال والقائمة تطول.. نسأل الله لهم الرحمة ونحسب انهم شهداء..
امي بدور :
ما تحزني افرحي..هاشم نعاه ودعا ليهو كل شعب السودان، دعوا ليهو بمفرداتو ، بي قصايدو ،  بي مسرحياتو الكل نعى ودعاء وبعد الدعاء صلاة على الرسول، وده كلو احكي مكانة  هاشم، ما تحزني وقولي هاشم يمثلنا وبيهو نفتخر ..
امي بدور :
وصيتي الكانت، اكون جنبك، جسد وروح. صبحت صعيبة بس ما مستحيلة.. بس ننتصر على شيطان التفاصيل وزمرتوا ،  قاعد أزور والكذب حقو، ونملي الاناء بالحسبنه، ووصيتي يومها بإذن الله تتنفذ واكون جنبك جسد وروح..
شهر تمام ولاد الملك صديق حالكم غير ، الغصة تطعن في الحلق، الحزن ذرف الدموع ، هاشم، حسن، نائلة، بدور، انصاف، وابو القاسم ، غطيتوا على المساحات ، علي الامكنة ، صحافة، اعلام، ووسائط داخل وخارج السودان..
وسبب الطلة الليلة، أرواح تحلق من بعيد فرحانة ، وروح هاشم بيناتن سعيدة، تقفز طربانة ، ما هي على الجمال و  الأخلاق مفطورة موهوبة.